ဇော်ဂျီမှသည် ယူနီကုဒ်သို့

ဘယ်က စပြောရမလဲ၊ ကျွန်တော် တော်တော် နောက်ကျနေတာကတော့ သေချာပါတယ်၊ အချိန်တော်တော် ကြာကတည်းက လူတော်တော် များများ ယူနီကုဒ် ယူနီကုဒ်နဲ့ ပြောတာ ကြားတော့ ကြားဖူးခဲ့တာပဲ၊ ၂၀၀၉ လောက်ကလား မသိဘူး၊ myanmar php က ကျွန်တော့် cbox မှာ ယူနီကုဒ် သုံးဖို့ လာပြီး တိုက်တွန်း သွားခဲ့သေးတယ်၊ ၂၀၁၀ ၂၀၁၁ လောက်မှာတော့ ယူနီကုဒ်က အသံ ပိုကျယ်လာတယ် ထင်ရတာပဲလေ၊ တကယ်တော့ အဲဒီ အချိန်တွေလောက် ကတည်းက ကျွန်တော်လည်း ယူနီကုတ်ကို ပြောင်းချင်နေခဲ့တာ၊ ဒါပေမယ့်ပေါ့ဗျာ၊ ကိုယ်ပိုင် အင်တာနက်ဆိုတာ အသာထား၊ ကိုယ်ပိုင် ကွန်ပျူတာလေး တစ်လုံးတောင် မပိုင်နိုင်လို့၊ ယူနီကုဒ်ကို မသုံးဖြစ်ခဲ့ဘူး၊ ဒီတော့ ဘဝအကျိုးပေး အတိုင်းပဲ ကျွန်တော်ဟာ ဒီကိစ္စမှာလည်း တော်တော် နောက်ကျပြီးမှ လုပ်ဖြစ်တယ် ဆိုပါတော့။

အခုတော့ ကျွန်တော် ရေးထားတဲ့ စာသားလေးတွေ အားလုံးကို ဇော်ဂျီကနေ ယူနီကုဒ် ပြောင်းလိုက်ပြီ၊ နောက်လည်း ယူနီကုဒ် နဲ့ပဲ တင်ပါတော့မယ်။ ဇော်ဂျီနဲ့လည်း အဆင်ပြေနေသားပဲ မင်းက ဘာလို့ ပြောင်းရတာလဲ မေးလာရင်၊ ကျွန်တော့်မှာ အဖြေရှိပါတယ်၊ ကျွန်တော် ဇော်ဂျီကို မုန်းလို့ ပြောင်းခြင်း မဟုတ်သလို ယူနီကုဒ်ကို သူများ ပြောတာနဲ့ အထင်ကြီးပြီး လိုက်ပြောင်းတာမျိုး မဟုတ်ပါဘူး၊ standard ကိစ္စ၊ ဘာညာ ကျွန်တော် သိပ်နားလည် လို့လည်း မဟုတ်ပါဘူး၊ အဲ ကျွန်တော် ပြောင်းချင်တဲ့ အဓိက အကြောင်းရင်း ကတော့ ဇော်ဂျီ ဖောင့်တွေက သဝေထိုးတွေ ရရစ်တွေက ရှေ့က စာလုံးတွေနဲ့ လိုက်လိုက် ကပ်နေလို့ပါ။ ဒီပြဿနာက သာမန် ဖေ့ဘွတ်တို့ ဘာတို့လောက် သုံးသူအတွက် အရေးမကြီးပေမယ့် ဘလော့ရေးတဲ့ သူတစ်ယောက် အတွက် အတော်အတန် ပြဿနာ ကြီးပါတယ်၊ တခြားလူတွေတော့ မသိပါဘူး၊ ကျွန်တော်ကတော့ ပို့စ်တစ်ပုဒ် တင်တဲ့အခါ တင်ပြီး ပြီးရောလို့ သဘောမထား တတ်ပါဘူး၊ စာလာဖတ်တဲ့ လူတွေ အနေနဲ့ ကြည့်ရင် ဘယ်လို နေမလဲ၊ စာလုံးတွေ ရှင်းရဲ့လား၊ နောက် စာလုံး အစိပ် အကျဲက ဘယ်လိုလဲ၊ ဒါတွေကို လိုက်ကြည့်ပြီး အဆင်မပြေဘူးလို့ ထင်ရင် အမြဲတမ်းလိုလို လိုက်ပြင်နေတတ်ပါတယ်၊ ဒီလို ပြင်တဲ့ အခါမှာ ဇော်ဂျီနဲ့ ရိုက်ထားတာဆိုရင် အပေါ်မှာ ပြောခဲ့သလိုပဲ စာလုံးတွေက လိုက်လိုက် ကပ်နေလို့ အဆင်မပြေပါဘူး၊ အထူးသဖြင့် justify နဲ့ တင်ရင် ပိုဆိုးပါတယ်၊ ဘေးနှစ်ဖက် ညီတာတော့ ဟုတ်ပါရဲ့၊ ဒါပေမယ့် အလယ်မှာက စိပ်တဲ့ နေရာ တအားစိပ်ပြီး ကျဲတဲ့နေရာ တအား ကျဲနေတတ်တယ်။ ဒါကပဲ အဓိက အကြောင်းပြချက် ဆိုပါတော့။ ယူနီကုဒ် အကြောင်း သူများတွေ ပြောခဲ့ကြတာလည်း ကြာခဲ့ပါပြီ၊ ကျွန်တော်က ခုမှ လိုက်ပြောနေစရာ အကြောင်းလည်း မရှိတော့ဘူး။ တစ်ကိုယ်တော် ခံယူချက် အနေနဲ့ ပြောရရင်တော့ သုံးချင်လာလို့ သုံးချိန်တန်လာလို့ သုံးလို့လည်း အဆင်ပြေလာလို့ အဲဒီလို ပြောရမယ် ထင်တယ်။

ယူနီကုတ် ပြောင်းလိုက်တဲ့ အတွက် အခုဆိုရင် ပြဿနာက သိပ်မရှိတော့ပါဘူး၊ ဖတ်တဲ့ သူတွေအနေနဲ့ windows နဲ့ ဖတ်မလား၊ linux နဲ့ ဖတ်မလား၊ ဒါမှမဟုတ် mac နဲ့ ဖတ်မလား ဖောင့်မရှိလည်း ဖတ်လို့ရအောင် လုပ်ထားလို့ ရပါပြီ၊ ဒီအတွက် ကိုစေတန်ကို သိပ်ပြီး ကျေးဇူးတင်ရပါတယ်၊ မိုဘိုင်းနဲ့ ဖတ်မယ်ဆိုရင်တော့ android မှာ ဆိုရင် firefox နဲ့မှ ဖတ်လို့ရမယ်၊ ဒါပေမယ့် ဖုန်းထဲမှာ ယူနီကုဒ်ဖောင့် သွင်းထားစရာ မလိုပါဘူး။

ဒီပို့စ်က ကျွန်တော် ဇော်ဂျီကနေ ယူနီကုဒ် ပြောင်းလိုက်တဲ့ အကြောင်းလေးလောက်ပါပဲ၊ ဘာမှမဟုတ်ပါဘူး၊ အခု ဒီစာလုံးတွေကိုတောင် ဇော်ဂျီနဲ့ ရိုက်ပြီး convert လုပ် တင်ထားခြင်း ဖြစ်ပါတယ်။

  • ညီမင်းခ

    ဇော်ဂျီနဲ့ မှတ်ချက်ရေးသော်လည်း အလိုလို ယူနီကုဒ် ပြောင်းသွားပါမည်၊ plug in ရေးတဲ့ ကိုစေတန်ကို ကျေးဇူး အထူး တင်ပါသည်။

  • မြန်မာစာ အရေးအသား မှာ စံစနစ် တစ်ခုတော့ ရှိတာ ကောင်းပါတယ်ဗျာ … ။ ဇော်ဂျီ က အရင်ပေါ်ခဲ့တာ ဆိုတော့ … Blogger အများစု က ဇော်ဂျီ ကို ဖက်တွယ်ထားကြတုန်းပါပဲ … ။ Unicode က လည်း Myanmar 2 | Myanmar 3 နဲ့ ကျွန်တော် သိသလောက်ကိုက Version တွေ ကွဲထွက်နေတာတော့ သိပ် အဆင်မပြေလှဘူး ထင်မိပါတယ် … ။ အားလုံး သုံးလို့ အဆင်ပြေမယ့် … ၊ တညီတညွတ်တည်း သုံးကြမယ့် … Standard တစ်ခု ဖြစ်လာစေချင်ပါတယ် ခင်ဗျာ …

  • မြန်မာစာ ရေးသူအားလုံး သုံးလို့ အဆင်ပြေမယ့်…၊ တညီတညာတည်း သုံးကြမယ့်…၊ standard တစ်ခု ဖြစ်လာစေချင်ပါတယ်။