ဘလော့ဂ်ကို ဘယ်လောက်ထိ ရည်မှန်းထားလဲ

ခေါင်းစီးက ခေါင်းစီးမဟုတ်ပါဘူး၊ တစ်နေ့က သူငယ်ချင်း တစ်ယောက်က မထင်မှတ်ပဲ ကျွန်တော့်ကို မေးလိုက်တဲ့ မေးခွန်းပါ။ ဒီမေးခွန်းမျိုးကို ဘလော့ဂ်ရေးနေတဲ့ ခင်ဗျားကို မေးမယ်ဆိုရင် ဘယ်လိုဖြေမလဲတော့ မသိဘူးပေါ့ဗျာ၊ ကျွန်တော်တော့ ရုတ်တရက် စကားလုံးရှာမရပဲ ကြောင်တောင်တောင် ဖြစ်သွားမိပါတယ်။ နောက်မှ “ရည်ရွယ်ချက်ရယ်လို့ မရှိပါဘူးဗျာ၊ ဒီလိုပဲ ရေးချင်ရာ လျှောက်ရေးတာ ပေါ့”လို့ ခပ်ပေါ့ပေါ့ ပြန်ပြောဖြစ် လိုက်ပါတယ်။ သူက “ရည်ရွယ်ချက် တစ်ခုခုနဲ့ လုပ်ရင် ပိုကောင်းမလားလို့ပါ”တဲ့။ ကျွန်တော် ခေါင်းခါရမလား…။ ခေါင်းညိတ်ရမလား…။ နောက်ဆုံးတော့ ခေါင်းညိတ်ပြလိုက်တယ်လို့ ထင်မိတာပဲ။

သူပြောသလိုမျိုး ဘလော့ဂ်ကို ရည်ရွယ်ချက်တစ်ခုခုနဲ့ လုပ်မယ်ဆိုပါတော့၊ ကျွန်တော် ဘာကိုရည်ရွယ်ရမလဲ၊ ဒီအခြေနေမှာရော ဘယ်လောက်ထိ ရည်ရွယ်နိုင်မလဲ၊ ခင်ဗျားမှာရော ဘလော့ဂ်နဲ့ပတ်သက်ပြီး ရည်ရွယ်ထားတာတွေ ရှိသလား၊ ရှိရင် ဘယ်လောက် အောင်မြင်နေပြီလဲ၊ ဘလော့ဂ်အပေါ်ထားတဲ့ ခင်ဗျားရဲ့ရည်ရွယ်ချက်က ခင်ဗျားဘဝနဲ့ ဘယ်လောက်ထိ ဆက်နွယ်မှုရှိလဲ၊ ကျွန်တော် လျှောက်စဉ်းစား မိနေတယ်။

နောက်စဉ်းစားမိတာ ရှိသေးတယ်ဗျ၊ ကျွန်တော့်ဘလော့ဂ်ကို လူရှိန်အောင် Title ကို “အိမ်မက်စိုက်ခင်း” လို့မပေးပဲ၊ တစ်ချို့တွေလို “Online writer association” (သို့မဟုတ်) “ရသစာပေ အနုပညာ ဘလော့ဂ်”လို့ ပေးရင် ကောင်းမလား…။ ဒါမှမဟုတ် “ဤဘလော့မှ စာများကို ခွင့်ပြုချက်မရပဲ မည်သည့်နေရာတွင်မှ ကူးယူသုံးစွဲ ခွင့်မပြု” (သို့မဟုတ်) “ဤဘလော့မှ စာများကို မည်သည့်နေရာတွင် မဆို အသုံးပြုနိုင်သည်” လို့ ခပ်တည်တည်နဲ့ ရေးထားရင် ကောင်းမလား။ အဲဒီလိုလဲ ရေးလို့က မဖြစ်သေးဘူး၊ ကိုယ်က ဘာမှဟုတ်တိပတ်တိ ရေးတာမဟုတ်သေးပဲနဲ့ ကိုယ့်ကိုယ်ကိုယ် ပစ္စလက်ခတ် အထင်ကြီးရာ ရောက်သွားမယ်။ နိုင်ငံရေးအကြောင်းလဲ မရေးရဲဘူးဗျာ၊ ဘလော့ဂ်လောကမှာလည်း “အသားထဲကလောက်” တွေက အများသား မဟုတ်လားဗျ။

အင်း… ဘလော့ရေးသူ အမျိုးမျိုး ရှိတာဆိုတော့ ရည်ရွယ်ချက်လည်း အမျိုးမျိုးပေါ့လေ။ လူဆိုတာကလည်း သူ့ဗီဇနဲ့သူ မှန်တယ်လို့ ထင်နေကြတဲ့ သတ္တဝါတွေချည်းပဲဟာ၊ ကိုယ့်လမ်း ကိုယ်လျှောက်တယ် ဆိုပေမယ့် သူများကို အဆိပ်ခပ်ပြီးမှ ကိုယ့်လမ်းဖောက်တာ မျိုးတော့ မဖြစ်သင့်ဘူးလို့ ထင်တာပဲဗျာ။