ဘုရားသခင်မရှိသည့်နယ်မြေ ဇာတ်သိမ်း

ထိုစဉ် အင်ဒီးယန်းနှစ်ယောက်က အိုဝင်ကို တဲထဲမှ ဆွဲထုတ်လာသည်။ သူ မနာကျင်ပါ။ သို့သော် သူ့မျက်လုံးများက ကြောက်လွန်းသဖြင့် ပြူးကြောင်ကြောင် ဖြစ်နေသည်။ သူ့ကို အင်အားသိပ်နည်းအောင် လုပ်သော ဘုရားသခင်ကို သူဒေါသ ထွက်နေသည်။ ခံနိုင်ရည်မရှိသော ယုံကြည်မှုသက်သက်ကို ဘာကြောင့် ဘုရားသခင်က သူ့ကို ပေးရသလဲ။ အိုဝင်သည် ဘက်ပတစ်ရှေ့တွင် ကြောက်ရွံ့တုန်လှုပ်စွာ ရပ်နေသည်။

“ခု မင်းရဲ့ ဘုရားသခင် ဘယ်မှာလဲ” အင်ဒီးယန်း ခေါင်းဆောင်က မေးသည်။
“မသိဘူး”
“မင်းမှာ ဘုရားသခင်ရှိလား”
“ရှိခဲ့တယ်”
“ဒါဖြင့် အခုရော”
“မရှိတော့ဘူး”
“သိပ်ကောင်းတယ်” ဘက်ပတစ်က ပြောလိုက်သည်။
“သူလွတ်လွတ်လပ်လပ်သွားပါစေ၊ သူ့ကို ဘာမှ မဖြစ်စေနဲ့၊ နောက်ပြီး သူ့လူတွေဆီ ရောက်အောင် ပြန်ပို့ပေးလိုက်ကြ၊ ဒါမှ သူ့ဘုန်းကြီးတွေကို ဘက်ပတစ်ရဲ့ ဘုရားသခင်မရှိတဲ့ နယ်မြေအကြောင်း သူပြန်ပြောနိုင်မယ်”

နောက် ဘက်ပတစ်က ဟေးစတော့ကာဒ်ဘက်လှည့်ကာ “ဒီနေရာမှာ ဘုရားသခင်မရှိဘူး” ဟုပြောလိုက်သည်။ စတော့ကာဒ်က ရယ်မောလိုက်၏။ ငယ်ရွယ်သည့် အင်ဒီယန်းစစ်သားတစ်ယောက်က သူ့လှံကို မြှောက်ကိုင်လိုက်သည်။
“မင်းမှာ ဘုရားသခင်ရှိလား” ဘက်ပတစ် အော်မေးလိုက်သည်။
“ရှိတယ်၊ ငါ့အဖ ဘုရားသခင်”
လှံသည် လေကို ဖြတ်ပျံလာပြီး စတော့ကာဒ်၏ ရင်ဘတ်ထဲသို့ နက်ရှိုင်းစွာ စိုက်ဝင်သွားတော့၏။  စတော့ကာဒ့်မြေပေါ်သို့ တဖြေးဖြေး လဲကျသွားသည်ကို အိုဝင်မြင်လိုက်ရသည်။ ထို့နောက် အင်ဒီးယန်းများက အိုဝင်ကို ကနူးလှေထဲ ထည့်ပေးလိုက်ကြသည်။
လူဖြူများ၏ ဘုရားသခင်ကို မယုံကြည်သော “ဘက်ပတစ်သည်ရက်ဒ်” ၏ အကြောင်းကို သယ်ဆောင်ရင်း သူ မြစ်ကို စုန်ဆင်းသွား ခဲ့တော့သည်။

2005 ခုနှစ်လောက်က American Moses ထဲက ဂျက်လန်ဒန်ရဲ့   “the God of his fathers” ကို ဘာသာပြန်ထားခြင်း ဖြစ်ပါတယ်။ ကျွန်တော် ဒီစာမူကို ဘာသာပြန်တုန်းက တခြားစာရေးဆရာ တစ်ယောက်ယောက်က ဘာသာပြန်ထားပြီး ဖြစ်တယ်ဆိုတာကို မသိလိုက်ပါဘူး။ နောက်တော့မှ စာအုပ်ဆိုင်ရောက်တော့မှ ဝတ္ထုတိုတစ်အုပ်မှာ ဆရာတစ်ယောက် ဘာသာပြန်ထားတာ တွေ့လိုက်မိပါတယ်။ ကျွန်တော်က အင်္ဂလိပ်စာ သိပ်မတတ် တတတ်နဲ့ ငယ်တုန်းက ပြန်ထားတာလေးမို့ အမှတ်တရ သိမ်းထားပြီး တင်လိုက်ပါတယ်။ ပထမဆုံး mysuboo.com မှာ တင်ခဲ့ပါတယ်၊ နောက်တော့ ကိုယ့်ဘာသာ  ဆိုက်တစ်ခုမှာ သိမ်းထားပြီး နဂိုရက်စွဲအတိုင်း ပြန်တင်ထားပါတယ်။

ဘုရားသခင်မရှိသည့်နယ်မြေ [အပိုင်း(၃)]

စတော့ကာဒ်နှင့် ဇနီးသည်တို့ကား တိုက်ပွဲအတွက် စခန်းကို စတင်ပြင်ဆင်ကြတော့၏။ သူတို့ အလုပ်လုပ်နေကြတုန်းမှာ အင်ဒီယန်းရွာထဲမှ စစ်ပွဲဗုံသံများ ကြားရတော့သည်။ အိုဝင်သည် ဘုရားစာ ရွတ်ရင်းရွတ်ရင်း သူ၏ ဘာသာရေးနှင့် ပတ်သက်သော စိတ်အားထက်သန်မှုများ တစ်စတစ်စ လျော့ပါးလာခဲ့သည်။ ကြောက်ရွံ့မှုသည် သူ့နှလုံးသား ထဲက မျှော်လင့်အားထားရာ နေရာကိုဝင်ယူလာသည်။ နောက်ဆုံးတွင် ဘဝကိုချစ်သောစိတ်က ဘုရားသခင်ကို ချစ်သောစိတ်ကို သိမ်းပိုက်လိုက်တော့သည်။ ဘဝကို ချစ်သောစိတ်။ သူ ထိုသို့ခံစားလာရသည်ကို သူ့ကိုယ်သူ မရပ်တန့်နိုင်တော့။ စတော့ကာဒ်သည်လည်း သူ့ဘဝသူချစ်သည်ဟု သူသိပါသည်။ သို့သော် စတော့ကာဒ်ကား အရှက်ရခြင်းထက် သေဆုံးရခြင်းကို ရွေးချယ်ပေလိမ့်မည်။

မည်းနက်သော ခြေထောက်အများအပြား စတော့ကာဒ်၏ စခန်းဆီသို့ ပြေးလာခဲ့ကြသည်။ မြားတွေသည် လေကို ထွင်းဖောက်ကာ တရွှီရွှီမြည်နေကြ၏၊ လှံတံတစ်ချောင်းက စတော့ကာဒ်ဇနီးသည်၏ ကိုယ်ထဲဖောက်ဝင်သွားသည်။ စတော့ကာဒ်၏ ကျည်ဆန်များကလည်း ပြန်လည်တိုက်ခိုင်နေပါသည်။ အင်ဒီယန်းစစ်သားလှိုင်းလုံးများ တစ်လှိုင်းပြီး တစ်လှိုင်းသူ့ခံတပ်များကို ကျော်တက်လာခဲ့ကြသည်။ အိုဝင် သူ့တဲတွင်းပြေးဝင်လာ၏။

သူ့လူနှစ်ယောက်ကား လျှင်မြန်စွာသေဆုံးသွားခဲ့ပြီ။ စတော့ကာဒ် တစ်ယောက်သာ ရပ်လျှက်ကျန်ရှိတော့သည်။ သူကား နံဘေးမှ အင်ဒီးယန်းများကို တိုက်ခိုက်နေတုန်းပင်။ သူ၏ လက်တစ်ဖက်က ပုဆိန်ကိုင်ထားပြီး တခြားလက်တစ်ဖက်မှာ သေနတ်ကိုင်ထားသည်။ သူ့နောက်မှ မည်းမှောင်သော လက်တစ်ဖက်သည် သူ့ဇနီး၏ ခန္ဓာကိုယ်အောက်မှ ခလေးငယ်ကို ဆွဲထုတ်သွားသည်။ နောက် ထိုအင်ဒီးယန်းသည် ခလေးငယ်ကို ကြာပွတ်ဖြင့် ဖြတ်ရိုက်လိုက်သည်။ သစ်တုံးဖြင့် ဝင်ဆောင့်၍ ကလေးငယ်၏ ခေါင်း ကွဲကြေသွားတော့၏၊ စတော့ကာဒ်လည်း ပြန်လှည့်ကာ ထိုလူ၏ ဦးခေါင်းကို ပုဆိန်ဖြင့် ဖြတ်ချလိုက်သည်။

ရိုင်းစိုင်းသော မျက်နှာများဖြင့် အင်ဒီးယန်းစက်ဝိုင်းသည် စတော့ကာဒ်ဆီ နီးကပ်လာသည်။ သူတို့နှစ်ကြိမ်တိုင် စတော့ကာဒ်ဆီ အလုအယက် တက်ကြသည်။ သူ့ခြေထောက် အောက်တွင် အင်ဒီယန်းများ လဲပုံနေ၏၊ မြေပြင်သည်သွေးများဖြင့် ရွှဲနေတော့သည်။ ဘက်ပတစ်က သူ့လူများကို ပြန်ခေါ်လိုက်ပြီး အော်ပြောလိုက်၏၊
“စတော့ကာဒ် မင်းဟာ ရဲရင့်တဲ့သူတစ်ယောက်ပဲ၊ မင်းရဲ့ ဘုရားသခင်ကို စွန့်လွတ်လိုက်ပါ၊ ဒါဆို ငါမင်းကို အသက်ရှင်ခွင့်ပေးမယ်”

ဘုရားသခင်မရှိသည့်နယ်မြေ [အပိုင်း(၂)]

တစ်ည သူအပြင်သွားနေတုန်း လူဖြူတစ်ယောက်က သူ့အိမ်ကို ချိုးဖောက်ဝင်ပြီး သူ့သမီးကို သတ်သွားခဲ့သည်။ သူတရားစွဲဆိုသောအခါ လူဖြူများ၏ ဘုရားသခင်က အပြစ်အားလုံးကို ခွင့်လွတ်ကြောင်း သူ့ကို ပြောကြသည်။ ထို့ကြောင့် သူသည် သူ့သမီးကို သတ်သော လူသတ်သမားကို သူ့လက်ဖြင့် ပြန်သတ်ခဲ့ပြီးနောက် သူ့အမေ၏ အမျိုးအနွယ်များရှိရာသို့ ထာဝရ ပြန်လာခဲ့တော့သည်။

“ငါကတော့ ငါ့ရွာကိုရောက်လာတဲ့ လူဖြူတွေဟာ ဒီမှာနေမယ်ဆိုရင် သူ့ဘုရားသခင်ကို စွန့်လွတ်ခိုင်းဖို့ သစ္စာဆိုထားတယ်။ ဒါပေမယ့် မင်းက ပထမဆုံးဖြစ်လို့ ငါဒီလို မလုပ်ပါဘူး၊ မင်းမြန်မြန်ထွက်သွားပါတော့” ဟု ဘက်ပတစ်က လူဖြူခေါင်းဆောင် ဟေးစတော့ကာဒ်ကို ပြောခဲ့သည်။ “ငါဒီမှာ နေရင်ရော…” စတော့ကာဒ်က သူ့ဆေးတံကို ဆေးဖြည့်ရင်း တည်ငြိမ်စွာ ပြန်မေးလိုက်၏။ “ဒါဆိုရင်တော့ မကြာခင် မင်းဘုရားသခင်နဲ့တွေ့ရမယ်၊ မင်းရဲ့ဆိုးရွားတဲ့ ဘုရားသခင် လူဖြူတွေရဲ့ ဘုရားသခင်ပေါ့ကွာ” အင်ဒီယန်းခေါင်းဆောင်က ပြောဆိုကာ စတော့ကာဒ်၏ စစ်စခန်းမှ သူ့ရွာသို့ ပြန်ထွက်ခွာသွားခဲ့သည်။

နောက်တစ်နေ့မနက် စတော့ကာဒ်သည် မြစ်ကမ်းဘေး တစ်လျှောက် လှော်ခတ်လာနေသော ကနူးလှေထဲမှ လူသုံးယောက်ကို ဒေါသမျက်လုံးဖြင့် ကြည့်နေသည်။ နှစ်ယောက်သည် အင်ဒီးယန်း လူမျိုးများဖြစ်၍ တတိယလူကား ဦးခေါင်းတစ်ဝိုက်တွင် တောက်ပသော အနီရောင် အဝတ်အစားများ ဝတ်ဆင်ထားသည့် လူဖြူတစ်ယောက် ဖြစ်သည်။ စတော့ကာဒ်သည် သေနတ်ကို လှမ်းယူပြီးမှ စိတ်ပြောင်းလိုက်သည်။ လှေကပ်လျှင် ကပ်ခြင်း ထိုလူဖြူသည် ကမ်းပေါ်ကို ခုန်တက်ကာ စတော့ကာဒ်ထံ အမြန်လှမ်းလာခဲ့သည်။

“တို့တွေ တွေ့ကြပြန်ပြီနော် ဟေးစတော့ကာဒ်၊ ငြိမ်းငြိမ်းချမ်းချမ်းရှိပါစ၊ ခင်ဗျားဟာ အပြစ်ရှိသူတစ်ယောက် ဖြစ်နေပြီဆိုတာ ကျွန်တော်သိပါတယ်၊ ဒါပေမယ့် စတာ့ဂ်ျအိုဝင်လို့ခေါ်တဲ့ ဘုရားသခင်ရဲ့တမန်တော်ဖြစ်တဲ့ ကျွန်တော်က ခင်ဗျားကို ဘုရားကျောင်းထဲ ပြန်ခေါ်သွားမှာပါ” “ဒီမှာ ကျွန်တော်ပြောမယ် နားထောင်” စတော့ကာဒ်က သတိပေးသည်။
“ခင်ဗျား ဒီမှာနေရင်တော့ ခင်ဗျားကိုယ်တိုင်နဲ့ ခင်ဗျားလူတွေဆီကို ပြဿနာခေါ်လာတာပဲ၊ ခင်ဗျားတို့အားလုံး အသတ်ခံရလိမ့်မယ်၊ ကျွန့်တော့်ဇနီး၊ ကျွန်တော့်ကလေးနဲ့ ကျွန်တော့်ပါ အသတ်ခံရဖို့ဖြစ်နေပြီ”

အိုဝင်က ကောင်းကင်ကို မော့ကြည့်ရင်း ပြန်ပြောသည်။ “နှလုံးသားထဲမှာ ဘုရားသခင်ရှိနေတဲ့သူနဲ့ လက်ထဲမှာ သမ္မာကျမ်းစာ ကိုင်ထားတဲ့လူကို ဘုရားသခင်က ကာကွယ်ပေးပါတယ်”

မနက်ခင်း ကုန်သွားသောအခါ စတော့ကာဒ်၏ စစ်စခန်းသို့ ဘက်ပတစ် ပြန်ရောက်လာသည်။ “မင်း မသေချင်သေးရင် ခရိယာန်ဘုန်းကြီးကိုထားခဲ့ပါ၊ ငါမင်းကို ငြိမ်းချမ်းစွာ ထွက်သွားခွင့်ပြုမယ်” ဘက်ပတစ်က အတင်းအကြပ်ပြောဆိုသည်။ အိုဝင်သည် သမ္မာကျမ်းစာကို ရုတ်တရက်ဆွဲယူလိုက်ကာ “ကျွန်တော် မကြောက်ဘူး။ ဘုရားသခင်က ကျွန်တော့်ကို သူ့ညာလက်နဲ့ ကာကွယ်စောင့်ရှောက်မှာပါ၊ ကျွန်တော် ဘက်ပတစ်နဲ့ သူ့ရွာကို လိုက်သွားဖို့ အဆင်သင့်ပဲ၊ ဘုရားသခင်အတွက် သူ့ဝိညာဉ်ကို ကျွန်တော်ကယ်တင်မယ်” ဟုပြောသည်။

ဟေးစတော့ကာဒ်က အိုဝင်၏ မျက်လုံးကို စိုက်ကြည့်လိုက်ပြီး “ဒါပေမယ့် ဒီမှာနေတဲ့ လူတွေအတွက်တော့ ဘုရားသခင်နဲ့ ပတ်သက်တဲ့ ထူးဆန်းတဲ့ စကားလုံး ရှိမှာ မဟုတ်ဘူး” ဟုပြောလိုက်သည်။ ခဏမျှ တိတ်ဆိတ်သွားပြီးနောက် ဘက်ပတစ် သူ့ရွာသို့ ပြန်သွားလေသည်။ အိုဝင်သည် သူ့လူနှစ်ယောက်ကို ခေါ်ကာ သုံးယောက်သားထိုင်ကာ ဘုရားစာ ရွတ်ကြတော့သည်။

ဘုရားသခင်မရှိသည့်နယ်မြေ [အပိုင်း(၁)]

ဝံပုလွေများသည် ကာရီဘူးသမင်အုပ်ကို တိတ်ဆိတ်ငြိမ်သက်စွာ ဝိုင်းရံထားကြသည်။ အညိုရောင် ဝမ်းပျဉ်းသားများက မြေပြင်နဲ့ ထိကပ်နေသည်။ ဝံပုလွေအုပ်သည် ကိုယ်ဝန်ရှိသော သမင်မတစ်ကောင်ကို ဝိုင်းဆွဲထုတ်လာကာ လည်ချောင်းကို ဖောက်ပစ်လိုက်သည်။ ကျန်သည့်သမင်များမှာ ခြေဦးတည့်ရာ ကစဉ့်ကလျား ထွက်ပြေးသွားကြ၏။ ဝံပုလွေများကား သမင်ကို စတင်စားသောက်ကြတော့သည်။

နောက်ထပ်လူမသိသော စိတ်မချမ်းမြေ့စရာ အဖြစ်အပျက်တစ်ခု အလက်စကားနယ်စပ်တွင် ဖြစ်ပွားခဲ့ပါသေးသည်။ ထိုနယ်စပ်၏ အလွန်ရှေးကျသော သစ်တောများထဲတွင် အင်အားကြီးသူများက အင်အားနည်းသူများကို နှစ်ထောင်ပေါင်းများစွာ သတ်ဖြတ်အနိုင်ကျင့် နေခဲ့ကြသည်။

သက်တံ၏ အစွန်းအဖျားဖြစ်သည့် သည်နယ်မြေတွင် အင်ဒီးယန်း လူအုပ်ကလေးများလည်း နေထိုင်ကြသည်။ သူတို့၏ ကျောက်ခေတ် ဘဝများကတော့ အဆုံးသတ်သွားပါပြီ။ ဆံပင်ဖြူဖျော့ဖျော့ မျက်လုံးအပြာရောင်ဖြင့် လူထူးဆန်းတစ်ချို့သည် မြောက်ပိုင်းနယ်မြေများကို ရှာဖွေတွေ့ရှိသွားကြသည်။ ခေါင်းဆောင်လုပ်သူများက အင်ဒီးယန်းများကို တိုက်ခိုက်ရန် သူတို့စစ်သားများကို အမိန့်ပေးခဲ့ကြသည်။ ကျောက်မြှားများနှင့် စတီးကျည်ဆန်တို့ ထိတွေ့ကြသည်။ အင်ဒီယန်းများကား လူထူးဆန်းများကို မတားဆီးနိုင်ခဲ့ကြပါ။ လူဖြူတို့သည် ရေခဲမြစ်များကို ပေါ့ပါးသော ကနူးလေများဖြင့် ဖြတ်ကျော် အောင်မြင်ခဲ့ကြသည်။ နက်မှောင်သော သစ်တောများကို ဖြတ်ကျော်ကာ ကျောက်တောင်များပေါ် တက်ကြသည်။

လူဖြူခေါင်းဆောင် တစ်ယောက်သည် မြစ်အနီးရှိ ယာယီတဲ တစ်လုံးရှေ့တွင် ထိုင်နေ၏ သူ့မီးပုံရှေ့တွင် မီးခိုးများနှင့် မီးညွန့်များ ထွက်နေသည်။ သူကား လက်ရှိသူစခန်း၏ မနီးမဝေးတွင်ရှိသော အင်ဒီးယန်းရွာကို ငေးကြည့်ခြင်းဖြစ်သည်။ ထိုတွင် သူ့တဲအတွင်းမှ နေမကောင်းသော ကလေးငယ်၏ ငိုသံထွက်ပေါ်လာပြီးနောက် ကလေးအမေ၏ နူးညံ့သိမ်မွေ့သော ကလေးချော့သံကို ကြားလိုက်ရသည်။ သို့သော် သည်လူသည် အရေးစိုက်နိုင်ခြင်းမရှိပါ။ သူသည် သူ့အား ဤနယ်မြေမှ ထွက်ခွါခိုင်းခဲ့သော အင်ဒီးယန်းရွာသူကြီး “ဘက်ပတစ်စ် သည်ရက်ဒ်” ၏ အကြောင်းကို စဉ်းစားနေခြင်းဖြစ်သည်။

ဘက်ပတစ်စ်က သူ့ကိုပြောခဲ့သည် “ငါ မင်းတို့ကို ဒီမှာ မရှိစေချင်ဘူး၊ မင်းကို ဒီမှာ နေခွင့်ပြုခဲ့ရင် မင်းက ချာခ်ျ့ကျောင်းတွေ ဆောက်ပြီး မင်းရဲ့ခရိယာန် ဘုန်းကြီးတွေနဲ့ မင်းရဲ့ ဘုရားသခင်ဆိုတဲ့ ပုဂ္ဂိုလ်က်ိုခေါ်လာမှာ”

အက်ပတစ်စ်သည် လူဖြူများ၏ ဘုရားသခင်ကို မုန်းတီးသူဖြစ်၏။ သူ့အဖေသည် အင်္ဂလိပ်လူကြီးလူကောင်း တစ်ယောက်ဖြစ်ပြီး သူ့အမေကား အင်ဒီးယန်းခေါင်းဆောင် တစ်ယောက်၏သမီး ဖြစ်သည်။ သူသည် လူဖြူများကြား၌ပင် ကြီးပျင်းခဲ့ရသည်။ သူငယ်စဉ်က ပြင်သစ်တစ်ယောက်၏ သမီးနှင့် ချစ်ကြိုက်ခဲ့ကြသည်။ သူမ၏ အဖေက သူတို့ လက်ထပ်ဖို့ကို သဘောမတူခဲ့ပါ။ ခရိယာန်ဘုန်းကြီးက သူတို့ကို လက်ထပ်ပေးဖို့ ငြင်းဆိုလိုက်သောအခါ သူသည် မိန်းကလေးကို တောထဲသို့ ခေါ်လာကာ သူ့မိခင်၏ မျိုးနွယ်များကြား၌ သွားနေခဲ့သည်။ တစ်နှစ်အကြာတွင် သူ့ဇနီးသည် ပထမဆုံးကလေးကို မွေးဖွားရင်း သေဆုံးသွားခဲ့သည်။ သူသည် ထိုကလေးကို လူဖြူများနှင့် အတူ နေထိုင်ရန် ပြန်ခေါ်လာခဲ့သည်။ လူဖြူများနှင့် ငြိမ်းချမ်းစွာ နေလာခဲ့သည်မှာ နှစ်ပေါင်းများစွာ ကြာလာခဲ့သည်။ သူ့သမီးလေးလည်း အရွယ်ရောက်ပြီး အရပ်ရှည်ရှည်လေးဖြင့် ချစ်စရာကောင်းပါသည်။